ចេញផ្សាយ ១៥ ធ្នូ ២០១៩
279
ខេត្តព្រះវិហារ ÷ កាលពីថ្ងៃទី១៣ ខែធ្នូ នៅសាលប្រជុំអាហារដ្ឋានលីហ៊ួត ខេត្តព្រះវិហារ មានរៀបចំសិក្ខាសាលាផ្សព្វផ្សាយសេចក្តីប្រកាស របស់ក្រសួងកសិកម្ម រុក្ខាប្រមាញ់និងនេសាទ ស្តីពីការបញ្ឈប់ការនាំចូល ការចែកចាយ ផ្គត់ផ្គង់និងប្រើប្រាស់បសុឱសថឌីក្លូហ្វេណាក់(Diclofenac) ក្រោមអធិបតីភាពលោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ។
លោក ពឹង ទ្រីដា ប្រធានមន្ទីរកសិកម្មខេត្ត បានដឹងថាតាមការចុះហត្ថាលេខារបស់លោករដ្ឋមន្ត្រី វេង សាខុន កាលពីថ្ងៃទី១៥ ខែកក្កដាឆ្នាំ២០១៩ កន្លងទៅ។បន្ថែមពីការផ្សព្វផ្សាយខ្លឹមសារសេចក្តីសម្រេចនេះថ្ងៃនេះយើងក៏ចូលរួមជាមួយពិភពលោកដើម្បីប្រារព្ធទិវាយល់ដឹងពីសត្វត្មាតអន្តរជាតិផងដែរ។
លោក ពឹងទ្រីដា ប្រធានមន្ទីរកសិកម្មបានបន្តថាសត្វត្មាតជាសត្វកម្រនិងជិតផុតពូជនៅលើពិភពលោក។នៅកម្ពុជាមានសត្វត្មាតចំនួនបីប្រភេទគឺត្មាតោភ្លើង,ត្មាតត្នោត,និងត្មាតប្រផេះ។បើតាមលទ្ធផលជំរឿនផ្នែកជំនាញរាប់បានច្រើនបំផុតចំនួន២៨៩ក្បាលប៉ុណ្ណោះហើយសត្វទាំងនេះកំពុងរស់នៅក្នុងខេត្តក្រចេះ,រតនគិរី,មណ្ឌលគិរី,ស្ទឹងត្រែង,និងព្រះវិហារ។
ក្នុងនោះខេត្តព្រះវិហារជាខេត្តទី២ដែលមានវត្តមានសត្វត្មាត។ឯសត្វត្មាតនេះមានតួរយ៉ាងសំខាន់ដែលមិនអាចមានសត្វប្រភេទផ្សេងណាមកជំនួសវាបានឡើយ។វាជាសត្វស៊ីសាកសពស្អុយរលួយជាអាហារ,ការពារមិនឱ្យមានមេរោគឆ្លងពីតំបន់មួយទៅតំបន់,រក្សាឱ្យបរិស្ថានមានភាពបរិសុទ្ធនិងកាត់បន្ថយការបំពុលខ្យល់។
លោកបន្តថាតាមការស្រាវជ្រាវកន្លងមកបានឱ្យដឹងថាសត្វត្មាតជាសត្វមានភាពរំញោចខ្លាំងនឹងសារជាតិថ្នាំឌីក្លូហ្វេណាក់។សារជាតិថ្នាំឌីក្លូហ្វេណាក់គឺជាសារជាតិផ្សំរបស់បសុឪសថដែលប្រើប្រាស់កាត់បន្ថយការឈឺចាប់,កម្តៅនិងរលាក។បសុឪសថឌីក្លូហ្វេណាក់ត្រូវបានប្រើដើម្បីព្យាបាលសត្វពាហនៈពិសេសគោក្របី។សត្វគោក្របីព្យាបាលដោយបសុឪសថឌីក្លូហ្វេណាក់នៅពេលដែលវាងាប់តាមព្រៃលុះសត្វត្មាតស៊ីខ្មោចគោក្របីនោះសត្វជិតផុតពូជនេះនឹងងាប់ដែរក្នុងរយៈពេលតែ១ឬ២ថ្ងៃតែប៉ុណ្ណោះ។
សមាសភាពចូលរួមមាន៖ អាជ្ញាធរស្រុក/ឃុំ ភ្នាក់ងារសុខភាពសត្វភូមិ មន្រ្តីកសិកម្មក្រុង/ស្រុក មន្រ្តីបរិស្ថាន មកពីស្រុក/ក្រុងពាក់ព័ន្ឋចំនួន០៤មាន ស្រុកឆែប ស្រុកជាំក្សាន្ត ស្រុកត្បែងមានជ័យ និងក្រុងព្រះវិហារ សរុបប្រមាណ 85នាក់។
មានការគាំទ្រនិងសម្របសម្រួលដោយ៖
-គម្រោង USAID ព្រៃឡង់បៃតង
-អគ្គនាយកដ្ឋានសុខភាពសត្វ និងផលិតកម្មសត្វ/MAFF
-អង្កការសមាគមអភិរក្សធនធានធម្មជាតិ(WCS)
-មជ្ឈមណ្ឌលអង្គរសម្រាប់ការអភិរក្សជីវចម្រុះ(ACCB)។
