ក្រុមហ៊ុនប្រមូលទិញកសិផលចំនួន០៣ បានចុះអនុសារណៈ ទិញកសិផលពីសហគមន៌កសិកម្មចំនួន១៣ក្នុងខេត្តព្រះវិហារ។ ថ្ងៃអង្គារ ១១កើត ខែទុតិយាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២០ ខែកក្កដា ឆ្នាំ២០២១ មន្ទីរកសិកម្ម​ រុក្ខាប្រមាញ់​ និង​នេសាទខេត្តព្រះវិហារ​ បានចូលរួមសម្រប សម្រួល ក្នុង"ពិធីចុះហត្ថលេខា លើអនុសារណៈក្នុងភាពជាដៃគូកសិធុរកិច្ច"​ រវាងតំណាងក្រុមហ៊ុនអ្នកប្រមូលទិញ ជាមួយសហគមន៍កសិកម្ម​ ក្នុងខេត្តព្រះវិហារ មាន (1)ក្រុមហ៊ុនសាជីវកម្មកសិកម្មកម្ពុជា CACC, (2)ក្រុមហ៊ុន Santana Agro Product Co.Ltd និង(3)Hang Harvest Agriculture Co. Ltd. ពិធីនេះធ្វើឡើងក្នុងគោលបំណង៖ ១/កសាងភាពជាដៃគូកសិធុកិច្ចដែលអាចជឿជាក់បានរវាងសហគមន៍កសិកម្មជាមួយក្រុមហ៊ុនធំៗដែលបញ្ជាទិញផលិតផល។ ២/ពង្រឹង​ និងពង្រីកខ្សែចង្វាក់តម្លៃទីផ្សារផលិតផលកសិកម្ម។ ៣/ពន្លឿនការរៀបចំសំណើកសិធុរកិច្ចរបស់សហគមន៍កសិកម្មដើម្បីដាក់ជូនគណៈកម្មការវាយតម្លៃទាន់ពេលវេលា។ ដែលមានសមាសភាពអ្នកចូលរួមមាន៖ តំណាងគម្រោងពិពិធកម្មកសិកម្មកម្ពុជា​ ថ្នាក់ជាតិ, ថ្នាក់ខេត្ត,​តំណាងក្រុមហ៊ុន​ អ៊េស ប៊ី​ ខេ​(SBK),​ តំណាងក្រុមហ៊ុនអ្នកប្រមូលទិញ, និងប្រធានសហគមន៍កសិកម្ម​ចំនួន១​៣ សហគមន៍ ក្នុងខេត្តព្រះវិហារ៕ សរុបចំនួន២៣នាក់ ស្រី០៥នាក់។ គាំទ្រថវិកាដោយ គម្រោង​ពិពិធកម្មកសិកម្មកម្ពុជា CASDP។